Metodologia: kontzeptua argitzen

Zer da metodologia? Hezkuntza ikuspegi jakin baten arabera irakaskuntza prozesua gauzatzeko eta ikasleen ikaskuntza sustatzeko antolatutako estrategia, teknika eta baliabideen multzoa da. Baina ez da soilik helmuga horretara mugatzen, baizik eta hodos, hitz grekoak irudikatzen duen bidaia edo bideari ere egiten dio erreferentzia.

Beraz, irakaskuntza metodologia irakasleen jarduna proposatutako helburuak lortzera eta irakaslearen ekintza bideratzen duten hainbat estrategia eta metodo modu koherentean aplikatzea litzateke.

Irakasle bakoitzak bere metodologia du, eta metodologia horrek faktore askoren eragina du: teknikak eta tresnak ezagutzea, aldez aurreko esperientziak, eskola-kultura, eskura dauden baliabideak, gizarte- eta eskola-testuingurua, etab.

Askotan kontzeptuaren inguruan agertzen diren terminoak bereizteko metodologia osagai hauetan banatuko dugu:

• Ereduak: ereduek irakaskuntza ulertzeko modu zabalari egiten diote erreferentzia (adibidez, maila anitzeko irakaskuntza-eredua, konpetentzien araberako eredua, etab.). Osagai epistemologikoa da.

• Modalitateak: ikaskuntza-irakaskuntza jarduerak eta ikasleen taldekatzeak egiteko espazioa. Antolaketa-osagaia da.

• Metodoak: ikaskuntza-edukia ikasleekin partekatzeko modua (adibidez, arazoetan, erronkatan, gamifikazioan…oinarritutako ikaskuntza). Osagai teknikoa adierazten dute.

• Estrategiak: metodo bat gauzatzeko teknikak eta baliabideen berariazko erabilera dira Osagai teknikoa zehazten dute.

• Teknikak: ekintza edo prozedura espezifikoak dira, egoera jakin batean ikaskuntza  errazteko aplikatzen direnak. Osagai teknikoak.

Horrela bada, Metodologia terminoarekin, proposamen didaktiko bat praktikan jartzeko plangintza-prozesua nolakoa den adierazten da. Jarraitu beharreko bidea diseinatzea eta teknikoki garatu nahi den ikaste-irakaste sekuentzia erabakitzeaz gain, zer hezkuntza mota eta zertarako hezten dugun pentsatzea eta horren arabera programatzea ere bada.

Definizioa osatzen duten ideia horietatik abiatuta, metodologia ezin da ez itxia ezta bakarra izan. Horregatik, curriculumarekin lotutako araudiak orokorrean orientabide metodologikoei eta proposamen pedagogikoei buruz hitz egiten dute, horietako bakar batean ere zehaztu gabe; izan ere, ikastetxe bakoitzak erabaki behar du zer hezkuntza metodo eta estrategiak martxan jarriko dituen ikaskuntza-irakaskuntza proposamenean.

Azken eguneraketa, 2025/05/29